Cerpen - Anak Iban

Cerpen ini mendapat Johan Pertandingan Menulis Cerpen Bahasa Iban peringkat IPG Kampus Rajang bagi tahun 2013. 

Anak Iban

“Sa, dua, tiga, empat, lima, nam, tu....juh, oh ha! Oh ha! Oh ha! Nya alai enda aku busung ngelangkah gunung, enda aku tulah nengkadah tanah, enda aku danjan nengkadah bulan,” munyi tusun leka biau niang aki iya ti semampai lekat ba pending Jebi. Jebi siku nembiak ti rindu ke adat bansa diri laban iya suah bendar udah ninga ini iya betusui jerita pasal adat bansa Iban ke enda ditemu iya ngelamatu. Bebida pendiau Jebi ari menyadi iya ke diau ba mengeri. Menyadi iya enda nemu pasal adat Iban laban ke rindu ke chara pengidup bansa bukai.

“Jebi, nama pengawa nuan tegenung baka orang ke udah nadai laki nya?” ku ini iya nanya Jebi.

“Ngenang orang mih ini. Ni Mit tadi dih ini?” saut Jebi.

“Nadai aku nemu penunga indu nya” saut ini iya ngilikka pala.

Mit siku indu ti balat amat udu ka bejegau laban ke enggai diau jenuh ba rumah. Mit semadi amat ka nembuka jam kemisi iya ba rumah panjai ini iya labanka dipansal apai iya.

“Ini, manah amat ukir naga ba tajau kitai nyin” ku Jebi muji pemanah ukir ba tajau pesaka sida iya.

“Amat munyi ku nuan nya uchu. Sigi landik orang munya ngaga utai bakanya. Peda nuan ukir pantang ba lengan niang aki nuan suba, ukir bungai terung. Chukup landik dichunggai ujung jari orang ka ngukir nya,” ku ini iya madahka Jebi.

“Enggai aku bepantang ini, takut aku chucuk jarum nya,” saut Jebi ngeredutka kening iya.

“Nadai aku ngasuh nuan bepantang dih uchu. Enti nuan bisi pantang jemah diatu kumbai orang indu lipai nuan legi,” ku ini iya madahka Jebi.

“Nama indu lipai nya ini?” tanya Jebi enda nemu utai.

“Nibuh nemu pan nuan. Bedau chukup umur agi,” ku ini iya ngemeli ka Jebi.

Jebi enggai agi ninga utai tusui ini iya laban ini iya selalu ngemelika iya. Jebi lalu pansutka ruai laban deka betemu enggau bakih iya Jawai. Jawai siku indu ti serambau enggau Jebi besekula. Jebi sigi udah pegari nama ba menua Selangau laban pemandai iya besekula. Iya suah dipuji tuai rumah sereta nyadi chunto ngagai bala nembiakka bukai.

“Jawai, aram bejalai tua mansutka peluh,” ku Jebi mai Jawai.

“Aram mih Jebi,” saut Jawai.

Jebi seduai Jawai sigi selalu bejalai ninting lemai laban deka mansutka peluh nitih ku jaku. Seduai bejalai meling rumah panjai sida iya. Pengerapat kaul seduai iya baka diri menyadi taja semina betunggal aja.

“Taun tu ila SPM kitai Jebi, udah sedia nuan?” tanya Jawai.

“Bedau temu agi aku tu Jawai. Nuan dih?” ku Jebi nimbal Jawai.

“Sama baka nuan mih Jebi, sama-sama mih tua berbendar belajar awakka ulih nyambung belajar baru ila,” saut Jawai.

Sepengudah bendar bejalai seduai iya mulaika diri ngagai bilik diri empu. Jebi lalu nulung ini iya engkanik manuk, jani enggau serati ba belakang rumah. Jebi sigi landik ngereja pengawa baka nya enda baka Mit.

“Nama lauk tu enda nyamai amat ini? Nadai lauk bukaika nyamai agi?” ku Mit merakka nyawa iya.

“Pama jegit tu bejaku! Ngiga kediri nuan enti ka makai utai nyamai,” ku Jebi nimbal menyadi iya.

“Ukai nuan tanya aku jedun! Ini tanya aku,” saut Mit malas Jebi.

“Udah nya! Kumbai seduai enda mali belaya depan pemakai,” ku ini seduai nyaut.

Mit lalu angkat ari bangku laban ringat ninga jaku Jebi ngagai iya. Mit sigi milih pemakai laban teleba makai utai nyamai begulai enggau apai indai iya ba mengeri. Jebi lain amat ari menyadi iya laban Jebi nemu makai belauk kasam ikan, kasam empasak, lauk sungai sereta mega lauk bukai.

“Tusah amat menyadi nuan nya Jebi, sigi udah pemakai anak Iban meh nadai ku enggau mih,” ku ini iya madahka Jebi.

“Nya mih ini, kapa enda iya lepi enda makai,” ku Jebi nimbal ini iya.

Sepengudah matahka lengan lemai nya Jebi alu nulung ini iya ngereja pengawa ba dapur. Jebi sigi enda ngandalka ini iya ngereja pengawa laban ini iya udah tuai.

Manuk bekukuk tumu pagi nandaka ari udah tawas. Jebi udah dani sebedau manuk bekukuk laban iya selalu nitihka ini iya dani tumu. Mit agi bekuruh ba dalam bilik.

“Bisi mindah nuan pagi tu ini?” tanya Jebi.

“Ka nurunka kebun legi Jebi. Nama nuan ka enggau aku?” ku ini iya nanya Jebi.

“Ka aku enggau ini. Nganti aku udah nyembui gari dulu legi,” ku Jebi nyaut ini iya.

Jebi sigi rindu enggau pengawa bekebun laban iya selalu dibai ini iya nanam sayur, nebas sereta ngereja pengawa bumai lebuh musim orang bumai padi. Taja pia Jebi enda kala ninggalka pengawa sekula iya laban iya nemu ngaga taga jam iya dikena iya belajar.

“Nama pengawa ba kebun legi dih ini?” tanya Jebi.

“Aku ngabas buah nangka kitai ke udah mansau sari nya Jebi,” saut ini iya.

“Engka gawa mih tadi ini, nya kebuah aku ka enggau nuan,” ku Jebi.

Sepemulai Jebi enggau ini iya ari kebun udah ngalih hari, Mit baru dani tinduk. Ini iya chukup meda perangai Mit ke buruk nya.

“Chukup pemuruk nuan nya Mit! Nama mih penyadi nuan nya ila? Keni ka belaki enti buruk dani? Pukul berapa jam diatu?” ku ini iya nganu Mit.

“Buntau mata aku ini. Nya meh kebuah aku laun dani. Anang mayuh jaku,” ku Mit enda takutka ini iya.

“Mayuh dalih amat, enti buruk sigi baka nya mih pendiau,” ku Jebi nganu menyadi iya nya.

“Anang kiruh ke aku nuan nya!” ku Mit nimbal Jebi.

Mit lalu ngambi simang iya lalu nurun mandi. Mit sigi enggai ninga jaku laban iya chukup diasika apai seduai indai iya nya kebuah iya enda nemu ngidupka diri baka Jebi.

“Bakani mih Mit nya ila ngidup kediri ba menua orang enti nyema iya jauh nyambung belajar ila?” ku ini iya sebana ngenang uchu iya siku nya.

“Nya mih ini. Tusah ga orang bakanya,” ku Jebi nyaut ini iya.

“Kitai sigi penatai anak Iban mesti nemu ngidupka diri enggau pendiau merinsa. Anang kelalu nitih pengidup orang bukai,” ku ini iya meri jaku pesan agai Jebi.

Jebi sinu ninga jaku ini iya laban udah lama iya begulai enggau ini iya. Iya merap ini iya laban kelalu sayau ke ini iya. Ari mit Jebi begulai enggau ini iya. Mayuh utai udah temu iya ari ini iya. Ni bansa pemakai asal rumah panjai udah temu iya magang. Ni bansa leka main Iban udah dipelajar iya ari ini iya. Ngereja pengawa bekebun, bumai, beranyam sereta nginga pemakai ba sungai udah temu Jebi magang. Pedis ngiga indu Iban ke nemu ngereja semua pengawa rumah panjai jemah diatu. Jebi nya mih pungka indu Iban kepenudi munyi ko orang tuai. Sigi udah peturun anak Iban.

Jebi sigi siku nembiak ti deka ngelatika jaku enggau daya idup Iban laban udah kurang bala nembiak diatu ka negi niri ka bansa diri. Jebi temegah ati laban diatu iya bisi belajar pelajar Jaku Iban ba sekula iya lalu iya mega ngambi peresa Jaku Iban ba SPM ila.

“Bisi belajar pelajar Jaku Iban nuan ba sekula nuan din Mit?” tanya ini iya.

“Nadai hari aku ka belajar utai baka nya ini, subjek aku udah chukup mayuh,” ku Mit nyaut ini iya.

“Patut nuan nadai utai temu pasal jaku Iban sereta adat asal kitai Iban,” ku ini iya nyindir Mit.

“Enda aku kiruh ke nya inik. Ukai nya beguna amat pan utai baka nya,” ku Mit jaku tinggi.

“Gamal nuan jai Mit. Anang nuan enda ingat penatai diri. Anang ngeludah ke langit labuh ninggang mua nuan empu,” ku Jebi madah ngagai menyadi iya.

“Nuan nibuh ngerara aku. Sama bedau temu pun pejalai tua tu udah tu ila. Sama agi bedau ambis belajar. Anang ngajar aku nuan,” ku Mit enda beradab enggau akak iya empu.

“Jai amat mulut nuan bejaku Mit. Enda nemu tulah nuan tu? Adat kitai Iban anang sekali nuan ngelengka, daya idup kitai mesti dikembuan awakka orang ngelala bansa kitai tu. Anang ngasuh orang ngindik bansa kitai nemu nuan!” ku ini iya nganu Mit.

Mit lalu berubah mua lalu ai mata iya keberai labuh niritik naya. Iya lalu lari ari bilik besai endur sida iya berandau nya lalu tama agai bilik tinduk iya. Ini iya amat geram ngenang utai sebut Mit nya.

“Numbas amat menyadi nuan nya Jebi,” ku ini iya tusah ati.

“Ba ya ini, nadai ku enggau mih utai udah baka nya,” ku Jebi mutus ati.

Pengudah puas berandau Jebi enggau ini iya nyau ngantuk. Jebi mulai kediri ngagai peninduk iya. Jebi berundingka penusah ati iya ngenang utai ke disebut menyadi iya Mit tadi.

Mata Jebi lalu enggai pejam malam nya. Iya agi memua ngenang utai disebut menyadi iya. Iya besampi ngarapka Mit berubah manah. Iya nemu apai indai iya sigi ngasika Mit lebih agi ari iya.

Tumu pagi hari tekenyit ini iya meda Mit tumu amat dani. Jebi mega tegepang meda Mit udah dani tumu agi ari iya. Jebi baka ke enda pechaya meda Mit baka nya.

“Tumu amat nuan dani Mit?” ku ini iya nanya Mit.

“Tumu mih ini. Enggai ke kumbai orang buruk legi,” saut Mit.

“Manah mih enti nuan udah nemu utai baka nya uchu, anang ulih ngajar belama,” ku ini iya madah ngagai Mit.

“Ini pengawa kitai sari tu dih ini?” ku Mit nanya pengawa ini iya ngasuh ini iya tegepang ninga.

“Nadai mindah uchu. Diau aja sari tu legi,” saut ini iya.

Mit udah nesal ke penyalah iya. Iya deka belajar chara ngidupka diri ari ini iya laban ini iya sigi siru meda sida iya menyadi. Jebi sedia ngajar menyadi iya nya ngereja pengawa orang indu ke enda temu Mit ngelama tu.

Ini iya tuchum aja meda Jebi nyadi pengajar ngajar Mit ngereja pengawa dapur. Mit baru nemu chara nyumai asi enggau manduk lauk. Ngelama tu Mit semina nemu ngerebus mi aja.

“Landik amat aka nyumai sereta manduk lauk,” ku Mit muji aka iya.

“Udah teleba diau ditu nya kebuah aka nemu,” ku Jebi madah ngagai Mit.

Mayuh utai dipelajar Mit ari aka iya. Mit baru nemu bakani idup anak Iban sebenar. Mit nesal ke penyalah iya ngelama tu. Mit belajar pasal adat Iban enggau ini iya laban iya enda nemu senentang asal idup Iban.

Enda lama agi Mit deka pulai ke mengeri laban pengawa sekula deka mula. Jebi enda kiruh laban iya sekula ba sekula enda jauh ari rumah panjai sida iya nya. Mit lembau amat pulai laban iya udah nemu bakani chara idup enggau orang ba rumah panjai. Sekumbang Mit udah belajar ba Jebi, Mit suah bendar enggau ini seduai aka iya mansai ikan ba sungai. Mit rindu amat melangkan enggau bala bakih iya.

“Lembau aku pulai ini,” ku Mit madah agai ini iya.

“Enggai nyadi nuan enda pulai, sekula nuan enda lama agi,” ku ini iya madah ngagai Mit.

“Ila nuan nemuai baru ga kitu Mit,” ku Jebi.

Mit rindu ngenang jerita ini iya pasal leka main Iban, daya idup Iban, pemakai asal orang Iban sereta pun penatai jaku Iban ke ditusi ini iya. Mit udah muka ati iya nerima asal diri dalam pengidup iya. Orang baka tu meh dikumbai kitai anak Iban ti tulin.

“Dikelala daun ari kayu, dikelala buah ari langgu, dikelala basa ari penyiru, dikelala bansa ari jaku,” ku ini iya nelai Mit.

“Selamat jalai Mit,” ku Jebi lebuh seduai ini iya nganjung Mit ngagai palan endur nganti bas.

“Selamat tinggal ini, aka,” ku Mit sambil ngepai ini enggau aka iya ari cheremin bas.

----UDAH AMBIS----