Cerpen - Chandie

Cerpen "Tikai Bemban" berjaya mendapat saguhati dalam Pertandingan Karya Kreatif Hari Guru Peringkat Negeri Sarawak bagi tahun 2014.

Tikai Bemban

“Chandie, manah amai penuduk nuan beranyam. Murih amat ke niang ini nuan suba. Munyi ko orang tuai, kini mih kuah naya enti enda ngagai pinggai asi. Kapa nuan nganyam tikai ngemayuh nya dih Chandie? Jual nuan pia? Enti dijual nuan laku amat tikai nuan nya. Sigi berebut mensia meli nya.” Ku Indai Sumbai nanya Chandie ke benung kisuk milih daun bemban iya.

Chandie enda mayuh jaku lebuh nyaut Indai Sumbai laban iya sigi ukai orang pejaku. Sepuluh leka tanya orang semina seleka aja disaut iya. Taja baru manggai umur lima belas taun, Chandie chukup landik beranyam ni bansa bungai tikai. Iya mega landik amat begagaka bala sida timpa, raga, tubang sereta utai bukai bekenaka tali getah. Enti utai nya udah tembu Chandie minta tulung indai iya nganjung utai nya ngagai kedai sigi endur orang bejual bala sida timpa, tikai enggau utai bukai.

“Chandie, umbas nya beranyam. Matahka lengan dulu kitai. Mayuh amat engkayu disumai aku tadi. Aram jampat!” ku indai iya ngagau ke Chandie ke benung beranyam di ruai.

Chandie ensugau angkat laban takut ninga indai iya muchau meda iya enda angkat lebuh dikangau. Iya enggai dikumbai indai iya temil. Taja kisuk beranyamka tikai Chandie mega nemu magi masa iya belajar laban iya peresa PMR taun nya. Iya bisi taga jam belajar kediri. Ba sekula Chandie selalu dikemeli ke bala sida sekelas laban iya ngena cheremin mata bingkai segala. Iya rabun kelalu balat. Taja pia tikai anyam iya enda kala salah bungai.

“Chandie, nuan nya nemu diri rabun ka ga duduk ba belakang. Uji nuan duduk ba depan din awak nuan ulih meda utai tulis pengajar,” ku Dina madahka Chandie.

“Ulih aku meda ditu dih Dina. Anang irau nuan. Nadai mih endur kusung agi di mua din,” saut Chandie.

Chandie siku anembiak ke enda entu landik dalam pelajar tang enda ga entu kurang dalam pelajar iya. Munyi ko orang diatu lima puluh, lima puluh mih pemandai iya. Iya selalu bulih lumur tengah-tengah ari semua sida sekelas maya peresa. Chukup makai munyi ko indai iya empu.

“Nadai kereja latih nuan Chandie? Enda patut bala pengajar nadai meri ba sekula tadi? Bedau duduk alu ka bejegau ga nuan? Indah baka keli ditetak iku. Ka kini nuan bebai ke duku nya?” ku indai iya nanya Chandie.

“Aku nyaut tanya nuan dulu mih indai. Malam legi nyadi mih aku ngaga kereja sekula aku. Bisi pengajar meri. Aku dibai Indai Sinda ngambi bemban ngagai pendai din. Duku tu kena aku ngambi bemban mih. Nama agi dih indai?” ku Chandie nyaut indai iya.

“Nadai nemu lelak nuan nya. Matahka lengan dulu nuan enggai ke lepi nuan legi. Udah nya baru tau nurun ke tanah,” pia ku indai iya.

Chandie nyuap asi baka ke bisi antu ngagai iya. Nyau kelalu berumban iya laban ke kelalu gagit ngulu ke Indai Sinda ngambi bemban ngagai pendai. Indai iya nyau ngilikka pala meda ulah Chandie. Chandie sigi rajin enggau orang beambi ke bemban laban iya mega kiruh enggau orang beranyamka tikai baka orang tuai.

“Ibu, nama Sinda enda enggau nuan dih? Tua aja pia?” ku Chandie nanya Indai Sinda.

“Tua aja mih endu. Nadai mimpi Sinda nya ka enggau pengawa baka tu. Baka nganti bulan labuh atas tapa. Udah matahka lengan nuan endu?” ku Indai Sinda.

“Udah ibu,” saut Chandie enggai ngemanjaika jerita.

Chandie sigi jelan rita ba menua sida ketegal iya ke rajin enggau orang ngereja pengawa di tanah. Taja iya enda landik dalam pengawa sekula tang iya landik begagaka utai anyam. Nadai bala indu ke serebak enggau Chandie nemu beranyam baka iya.

“Nama juluk ati nuan endu?” ku Indai Sinda nanya Chandie lebuh seduai benung belelak udah ke mantap bemban.

“Enda besai juluk ati aku ibu. Pemandai nadai ga aku tu. Orang sekula aku sekula mih. Ambis pom lima ila aku deka bejual barang ke udah digaga aku ngelama tu. Enti udah mujur aku deka nunda Endun Simbut ke bisi kedai diri empu palan nyual asil jari,” ku Chandie madah ke juluk ati iya.

“Manah mih nya Chandie. Nitih ke bekau abi kaki, nitih ke pelepi abi jari. Sigi aja pesan aku endu, anang baka kepayang ngadaka dilah,” ku Indai Sinda meri jaku peransang ngagai Chandie.

Maya ba sekula Chandie suah amat tegenung baka ke bisi utai dikenang. Iya sigi enda mending utai ajar pengajar. Lebuh maya iya leju ninga pengajar kutap-kutap ba mua kelas iya nyarikka bup iya lalu ngelukis bungai tikai ke deka dianyam iya. Suah amat iya ditikau Pengajar Jimbun ngena cuk. Iya ngaga diri baka ke nadai ngaga penyalah.

“Chandie, lapa nuan ka amat tegenung? Sapa dikenang nuan? Sulu peraja mata nuan?” ku Pengajar Jimbun ngemelika Chandie.

Iya enda nyaut tanya Pengajar Jimbun laban iya sigi enda entu ka bejaku dalam kelas. Iya mina selalu berandau enggau bakih iya Dina aja. Dina aja ulih begulai enggau iya dalam kelas. Dina nya mih selalu nulung iya lebuh maya iya dikachau bala sida Jalin, Nyala enggau Gerang. Enti Dina nadai iya mih selalu nyabak laban sida tiga nya.

“Dara cheremin mata! Taja enda pandai sekula tang iya rajin gawa,” ku Gerang belagu ngemelika Chandie ke benung kisuk ngaga churak bungai dalam bup iya.

Chandie sigi nadai ati deka nyaut utai ko Gerang laban iya enggai ngiga laya enggau orang bukai. Gerang bejaku semampai baka nibarka jala enda betating. Sigi alit ati Chandie meda Gerang enggau bala bakih iya ke bukai. Selalu amat ngasuh iya pedis ati.

Hari beganti hari, bulan beganti bulan, taun beganti taun, siang betukar malam enda berasai Chandie udah belajar ba pom lima. Iya gaga amat ati laban Dina semampai begulai sekelas enggau iya. Taja pia iya mega tusah ati laban bala ‘jelu babas’ munyi ko iya agi sekelas enggau iya mega. Gerang, Jalin enggau Nyala sigi enda nemu berubah mengkang baka selama.

“Chandie! Mugu hari nuan tembu beranyam tikai. Pulai sekula udah matahka lengan nuan lalu beranchau beranyam! Malam bulan keleman nuan agi kisuk beranyamka tikai nuan nya. Kemaya nuan deka belajar? SPM nuan taun tu nemu nuan Chandie? Nama bisi orang nanya chara keni ngaga tikai dalam peresa nuan nya ila?”

Indai iya muchau meda Chandie alu enda muka bup iya enti diau di rumah. Iya semampai bekepit enggau lambar bemban iya enti ba rumah. Chandie tuchum aja ninga indai iya bejaku. Jaku indai iya alu enda tama untak iya. Tang batang enda telanggarka tuga.

Chandie enda bemunyi. Indai iya sempama baka ke nanya laut bira. Nadai seleka jaku pansut ari mulut Chandie. Iya majak kusir-kusir milih lambar bemban ke dikena iya beranyam. Makin peluh makin bekayuh, makin lelak makin berumpak mih Chandie begaga ke tikai. Taja tubuh mit leka semakau tang asil jari iya chukup rumpas dipeda. Nadai siku orang enda muji pemanah tikai ke dianyam Chandie. Bisi siku orang dagang ke bansa Cina selalu meli tikai ari iya. Orang dagang nya sigi orang ke bejual perengka baka nya.

“Manah amai churak bungai tikai nuan nya Chandie. Landik amat nuan ngaga nya. Enti bisi hari deka ga aku belajar ari nuan,” Ku Indai Sinda muji bungai anyam tikai Chandie.

“Enda ga manah amat nya ibu. Nuan landik agi ngaga bungai.”

Chandie sigi enda besai jaku baka orang bukai. Iya baka empeliau bedua iku. Bisi sekeda mensia enda tau dipuji lalu sengung lubang idung. Munyi ko jaku ini tuai sida Chandie suba, orang Engkari madahka diri nadai besi, dinga tak besehari-hari ngambuh duku, orang Skrang madahka diri nadai pinang, peda tak bekechirak ga baruh dagu, orang Julau madahka diri nadai semakau, peda tak bekeliau ga api ruku. Chandie sigi murih amat ke niang ini iya suba. Enda sumbung baka orang bukai.

“Bemban ke diambi seduai nuan maya nya udah diintu dih Indai Sinda?” ku Indai Chandie nanya Indai Sinda ke benung duduk jenuh meratika jari Chandie beranyam.

“Bedau agi wai. Agi mayuh pengawa bedau tembu. Enggai ga baka manang nangkap semengat laban pengawa bumai baka sangkuh aduh, diasur pedis, dibatak pan pedis. Agi mekang-mekang amat anak padi aku ba umai din wai,” pia ku Indai Sinda nyaut Indai Chandie.

Sinda kejat-kejat datai ngelawa indai iya ke  benung ba ruai sida Chandie. Sinda sigi selalu bebakih enggau Chandie laban seduai sigi ukai orang bukai. Betampung pala.

“Chandie, nama bungai tu gaga nuan singit dih? Uji gaga nuan lurus manah agi peda aku,” ku Sinda enda chamang-chamang lalu bejaku madahka Chandie meri penemu iya.

“Nibuh bejaku nuan ke beseling kain beranyam ke tikai nya Sinda. Tawang landik bedagang diajar ga bebeli, Sebaru landik merau diajar ga ngemudi. Anang nyempelah bangah enda ditunu, nyeregau lachau niki alu nuan nya Sinda. Uji nuan belajar ari Chandie beranyamka tikai.”

Bedau sempat Chandie nyaut utai padahka Sinda dia Indai Sinda dulu agi nyaut utai tanya anak indu iya nya. Sinda sigi udu mayuh jaku. Mayuh utai rara.  Indai Chandie tuchum lelegup meda Sinda kena anu indai iya empu.

Lebuh pagi nya, Pengajar Jimbun tama kelas sida Chandie. Pengajar Jimbun ngajar pelajar Jaku Iban. Pengajar nya chukup mentas - siru enggau bala anembiak. Nya alai iya chukup dikerinduka semua anembiak ba sekula nya. Dalam kelas sida Chandie nadai siku anembiak kala ngelaban jaku ajar iya laban lebuh iya bejaku diseretaka iya enggau jaku lalau. Indah baka apai diri empu. Iya mega landik amat ngajar.

“Nama berita kita semua? Aku rindu amat begulai enggau kita. Rindu ngajar kita. Aku ngarap kita belajar bebendar ngambi ulih maju baka orang bukai. Udah tu ila, nadai agi kitai begulai baka tu. Bisi pengajar baru ngajar kita. Siti pinta aku, begau nitihka terantang, rayah nitihka gendang. Dinga manah jaku pengajar baru nya ila. Enti kita udah pandai, anang sumbung. Enti nyadi ketuai dudi ari ila anang bechiping adat baka bisi niki nibung, bisi niki pinang. Anang nitih ati diri empu aja laban orang baruh ari kitai pan sama mega laban ingkat nemu nyapat lubang kilat tang enda nemu mampul lubang guntur. Bengkang nemu nensang lubang nyang, tang enda nemu mampul lubang lambur.”

Panjai jaku pesan Pengajar Jimbun ngagai sida Chandie sekelas laban iya kelalu sinu ninggalka sida nya sekelas. Enda kala ai mata Pengajar Jimbun neritik ba mua sida iya tang baru sarinya aja sida tepeda ke Pengajar Jimbun nyabak. Siku-siku sida iya meri tanya ngagai Pengajar Jimbun nama kebuah iya nyebut jaku baka nya.

“Aku baru nerima surat madahka aku ulih pindah. Pindah ngajar ngagai menua asal aku empu. SMK Lubuk Birai. Minggu tu mih ke penudi aku ditu. Berat asai ati ninggalka sekula tu laban udah kelalu lama aku ngajar ba sekula tu. Udah mayuh bala anembiak nyadi pengajar, lutur, MA enggau pengawa bukai udah diajar aku ba sekula tu. Aku ngarapka kita nyingkang sama sekaki enggau orang. Rajin sekula makai gaji idup kita tau senang munyi ko jaku besai periuk besai ga kerak, besai beliung besai ga abak. Hari lima tu aku deka betemu enggau semua kita sebedau aku mupuk pulai.”

Chandie nyau nyabak sikuk-sikuk laban kelalu sinu ngenang Pengajar Jimbun ke deka pindah ngagai sekula baru. Bala orang indu bukai pan nyau nyabak baka ke nyenggai orang parai. Mudah amat ati sida iya ngasuh ai mata pansut nurutu naya.

“Minta kasih semua bala bakih, aku deka bejaku. Hari lima tu bisi makai selamat ke Pengajar Jimbun ba dewan makai. Siku-siku kitai dilalau meli perais ke tau diberi ngagai Pengajar Jimbun. Beri mih enggau ati ti rurus laban pemanah iya enggau kitai enda ulih dibalas ngena emas ti berega.”

Tuai kelas sida Chandie meri jaku senentang pengawa makai selamat Pengajar Jimbun ti deka diatur kena ke hari lima ti deka datai. Bala sida ke pemisi alu berandau deka meli baju ke bisi jenama. Meli jam rega mar. Meli bungai, anak patung, kasut enggau utai bukai munyi ko randau sida iya.

“Nama perais beri nuan ngagai Pengajar Jimbun Chandie?” ku Dina nanya  Chandie ke benung gisai-gisai berunding.

“Enda nemu aku ka meri nama Dina. Nama beri nuan dih?” ku Chandie nyaut Dina.

“Aku ngasuh indai ku meli minyak wangi Centre Action Eau de Toilette Spray ba AVON. Sigi wangi ungkup orang laki empu nya Chandie. Enda mar rega iya. Semina RM59.90 aja peda aku maya nya,” ku Dina madahka Chandie perais ke deka diberi iya ngagai Pengajar Jimbun.

Chapuh sida iya sekelas mikir nama perais ke patut diberi ngagai Pengajar Jimbun. Chandie alu enda tepikir ke nama perais ke deka diberi iya. Iya jarang meri orang perais. Kusut runding iya ketegal kelalu suah mikir ke perais nya.

“Indai, apai, nama perais ke manah diberi aku ngagai Pengajar Jimbun lebuh maya makai selamat iya pindah hari lima tu ila?” ku Chandie nanya apai seduai indai iya ke benung duduk jenuh ngirup kupi.

“Daun empasa! Kasam tubu! Kasam pama! Terabai! Sangkuh! Pua kumbu! Salai ikan! Budu! Lulun ikan terubuk! Baju! Selampai!”

Apai enggau indai iya bela sama nyaut nambahka tusut runding Chandie milih nama perais ke patut. Apai enggau indai iya lekik-lekik meda Chandie nyau baka pitak ke dibuai mata. Indai iya lalu mujuk Chandie nangi ke iya ringat.

“Endu, nama nuan ka tusah ati mikirka perais nya. Beri aja Pengajar Jimbun tikar bemban ke dianyam nuan. Nya baru perais nuan lain ari orang bukai,” ku indai iya meri buah runding ngagai Chandie.

“Amat ga nuan endu. Rusa di kaki tangga enda diemparu, kunchit di tisi langit deka ditunu. Utai nyau nyengenda enggai enda tusut runding ga nuan ngiga. Setuju nuan?” ku apai iya nyukung penemu indai iya.

“Aaaaaaaaaaaaaaaaaaaaaaaaaaaaaaaaa!!! Setuju! Tang tikai ke udah tembu semua nya udah bisi orang ngambu magang apai. Lima gulung nyin udah dibeli Cina dagang. Iya ke baru tembu nya udah diambu Ibu Meni. Kati dih indai? Nganyam baru mih aku. Kada mih sempat dih?” pia ku Chandie tusah ati.

Chandie ngabas laluh lambar bemban iya ke udah dikena iya nganyam tikai ungkup Ibu Meni. Nasit iya manah laban laluh bemban nya agi mayuh. Chandie baka ke ngerumpang para angus beranyam. Iya nitih ke bungai tikai ke dianyam iya ke Ibu Meni.

“Indai, lemai legi aku deka mantu Indai Sinda berapi laban sida iya ngintu hari pengada anak biak iya legi seraya ngintu pemulai anak lelaki iya ke udah lama ninggalka rumah panjai baka manuk pulai ke tansang, baka burung pulai ke sarang. Kada sempat aku beranyam baru legi dih?” ku Chandie madah ke indai iya.

“Kapa nuan kisuk ke Indai Sinda nya dih. Anak indu iya bisi mantu iya. Nuan baka raung ke ngandung, pama ke bepenti, lutung ke beketebung, empeliau bengkak jari. Manah agi nuan nganyam tikai nuan nya. Bisi agi asil dipeda,” saut indai iya ngasuh ati Chandie bebagi laban iya udah bejanji enggau Indai Sinda ga tadi.

“Chandie, nemu nuan bakani deka nyeliahka penusah? Anang sampai nuan kumbai Indai Sinda betebu di mulut, belemetak di ati. Nya dikumbai orang ninggang luang ninggang papan, ninggang bilik ninggang penaik, ninggang tikai ninggang balai. Nuan nemu agi nama utai ke patut digaga nuan,” pia ku apai iya meri jaku ngagai Chandie.

Sepengudah Chandie ninga jaku apai iya, iya lalu beguai ngelawa Indai Sinda madahka penusah iya. Indai Sinda ninga sebana ati Chandie. Indai Sinda enda mejal Chandie laban iya nemu Chandie sigi bisi pengawa bukai. Indai Sinda mina ngasuh iya datai lebuh maya sida ngintu hari pengada lebuh malam hari.

“Chandie, udah beli perais nuan? Enggi aku udah dibeli indai aku kemari. Pegila kitai meri nya ngagai Pengajar Jimbun,” ku Dina nanya Chandie.

“Enda nemu agi aku Dina. Enda nemu nama utai ka diberi. Enda nemu nama utai ke deka Pengajar Jimbun,” ku Chandie ngaga diri bedau bisi perais tang iya deka meri Pengajar Jimbun tikai bemban anyam iya empu.

Dina meri chunto perais ti tau diberi ngagai Pengajar Jimbun. Macham-macham utai disebut Dina. Semua utai nya nadai ulih manding tikai bemban ke deka diberi iya ngagai Pengajar Jimbun.

Pulai ari sekula Chandie alu nyambung nganyam tikai iya ti deka tembu enda lama agi. Semina tinggal nyilup aja agi bedau. Chukup manah bungai tikai nya. Chandie asai ke pansut ari nyawa baya pengudah tikai ke dianyam iya udah tembu.

Bahhh! Chandie chukup tekenyit laban ke ditegah indai iya le belalai ba belakang pintu. Chandie baka baya ditegah indu. Chandie mai gulung tikai bemban iya ke udah tembu nya tama ke bilik. Tikai nya ditanchang iya ngena reben churak gadung.  

“Kemaya ibu luchuk purih nuan ngambi tikai iya nya dih Chandie?” ku indai iya nanya Chandie.

“Entah!” ku saut Chandie seleka.

Pagi nya Chandie minta anjung apai iya ngena mutosikal nurun ke sekula laban iya enggai ngesan tikai bemban nya nurun ke sekula. Seharinya hari lima. Hari makai selamat Pengajar Jalin pindah ngagai sekula bukai. Chandie berasai malu amat mai tikai nya tama ngagai kelas sida iya. Semua orang merening Chandie ke merap tikai iya nya mansang ngagai kelas sida iya. Mayuh ga orang ketawa ke iya.

“Nama nuan bebai tikai nurun sekula Chandie? Enti agi belala nibuh nurun sekula nuan. Beranchau mih nuan dia enti ka tinduk,” pia ku Gerang ngemelika Chandie lebuh maya iya tama pintu kelas megai tikai iya.

Chandie enda nyaut seleka utai padah Gerang laban iya nemu sigi ngemelika iya orang laban perais iya aja nyelai ari orang bukai. Iya enggai bejaku laban enggai ke tebak sengkilu diri empu. Dina mega nyau kakah-kakah ketawa meda Chandie ngemai tikai ngagai kelas. Chandie enda bemunyi laban ngenat ke malu dalam ati iya.

Semua anembiak bebaris nurun ngagai dewan. Chandie enda mai tikai ia nya ngagai dewan laban iya malu orang bukai meda. Iya mina mai tubuh murus aja. Iya meda perais orang bukai dalam kutak magang semina enggau iya aja ke ayan nyengenda dipeda.

Siku-siku orang betabik jari enggau Pengajar Jimbun. Mayuh agi bala anembiak ke nyabak laban kelalu sinu. Chandie mega nyabak laban Pengajar Jimbun siku ari pengajar ti paling manah enggau iya. Pengajar Jimbun selalu meri jaku lalau ngagai iya ngasuh iya belajar bebendar. Datai ba pam iya Chandie lalu madah ngagai Pengajar Jimbun iya bisi perais deka diberi tang iya empu nganjung ngagai entukar Pengajar Jimbun empu legi.

Chukup mayuh perais ulih Pengajar Jimbun seharinya laban bala anembiak sigi rindu ke iya. Enda kala iya bejaku kasar enggau bala anembiak lebih agi maya iya nyadi warden. Kepala pengajar mega muji Pengajar Jimbun siku ari pengajar ti manah sereta mentas enggau anembiak. Agi berupai bekau ai mata Pengajar Jimbun ba kuyu iya sepengudah semua anembiak betabik jari enggau iya. Siru amat Pengajar Jimbun. Petara aja nemu pemanah iya.

“Pengajar, tu mih aja perais ti ulih beri aku ke nuan. Tikai bemban. Tikai tu asil jari aku empu. Aku ngarap nuan panjai umur, murah jereki, lantang senang dudi hari ila pengajar. Jaku nuan semampai dikingat belama. Tikai bemban tu mih pengingat aku ba nuan pengajar. Lebuh nuan meda tikai tu mesti nuan ingat ke aku ila,” ku Chandie lalu nyua ke tikai bemban iya ngagai Pengajar Jimbun.

Chandie sempat betundi enggau Pengajar Jimbun. Nya mih kepenudi iya betemu enggau Pengajar Jimbun. Pengajar Jimbun meri Chandie jaku peransang sekula ngambika Chandie mujur dalam pengawa ti dikereja iya. Pengajar Jimbun tuchum-tuchum meda tikai bemban ti diberi Chandie ngagai iya.

“Tu mih keterubah aku nerima perais ke nyelai ari anembiak sekumbang 35 taun aku udah ngajar ba sekula. Semua orang meri perais dalam kutak tang Chandie tu siku anembiak ti nyelai ari orang laban iya meri perais ti digaga iya ngena jari iya empu. Chukup badas, manah, rumpas tikai bemban pemeri ari Chandie. Tikai bemban. Tikai bemban pengingat enggau Chandie.” Ku Pengajar Jimbun bejaku dalam ati lalu ngurit ke entukar iya ninggalkan kandang sekula.

Chandie udah tembu belajar ba pom lima. Peresa SPM ulih iya mina chukup makai aja. Iya ngambi kus dalam pengawa ngaga asil jari. Apai enggau indai iya enda nemu ka nagang pengingin ati iya laban nya sigi pengawa ke dikerinduka iya ari mit. Udah bulih setipikit ari kus nya Chandie ngembuan pemendar muka kedai iya empu. Iya minjau duit ari sebengkah bank kena berengkah ke pengawa iya. Pemun pengawa ngaga asil jari iya sigi udah bisi.

‘CHANDIE TIKAI BEMBAN & HANDMADE CRAFT SDN. BHD.’ udah maju nyual mayuh sebengkah perengka asil jari digaga iya empu. Chandie diatu udah bisi kuli kediri empu enggau iya begaga ke tikai sereta utai bukai. Chukup maju kedai iya asil ari pengerajin iya empu. Taja enda pandai sekula tang Chandie chukup landik ba pengawa asil jari. Agi idup Chandie sigi agi ngelaban.

“Tikai bemban! Apu! Nyau ingat ke Pengajar Jalin aku sepengelama 10 taun udah enda betemu. Nama mih rita pengajar diatu? Arapka iya gerai baka selama. Tikai bemban nyadi pengingat belama ya.”

Chandie ngenang Pengajar Jimbun lebuh maya iya nganyam tikai bemban. Pengajar Jimbun nyau sinonim enggau tikai bemban. Tikai bemban majak laku, pengawa dagang Chandie makin maju. Majak jampat jari Chandie nyilup tikai bemban iya. Juluk ati Chandie udah nyadi nyata nitihka singkang Endun Simbut. Munyi ku Indai Sinda, nitih ke bekau abi kaki, nitih ke pelepi abi jari.