Cerpen - Serina

Cerpen " Serina" hanya mendapat saguhati untuk Pertandingan Karya Kreatif Hari Guru Peringkat Negeri Sarawak bagi tahun 2014.

Serina

Ujan mesi-mesi agi balat nerutu naya masahka utai tumbuh ba dunya. Jelu tupi rauh-rauh minta pemakai. Pagi nya chelap amat asai laban hari ujan diserumba ke embun pagi ti ngigit isi datai ke tulang dalam tubuh.  Bala mensia ba rumah panjai nya apin udah dani magang laban ke ngasai ke penyamai tinduk bebunggul dalam pua. Serina tumu pagi udah kiruh bebela ba dapur. Ini iya rauh-rauh ngangau ke bala manuk, bala uduk, bala serati enggau bala jani matah ke lengan ba kandang diri empu.

Serina semampai ngenang apai enggau indai iya ke udah lesi bebadi ba penusah jalai alun lapan taun ti udah lalu. Entukar ti dikena apai seduai indai iya kempik dilantak luri pasir lalu ngujungka apai enggau indai iya kena tinggang luri pasir nya. Apai enggau indai iya maya nya deka mansang pulai ngagai rumah panjai sida iya laban deka ngintu pengerami hari Gawai tang enda mukai-mukai pengerami betukar nyadi sabak ati ngagai Serina. Pengudah ari cerita nya Serina lalu diibun ini iya sampai ke diatu.

Siang beganti malam, Serina tetap ngeringka ati iya ngelaban penguji diberi petara. Serina enggai pengawa pelajar iya puntan ketegal kelalu sinu ngenang apai enggau indai iya ti udah pergi ninggal ke iya. Taja pia iya tetap bersembiang ke apai seduai indai iya lantang senang diau ba menua serega.

“Oh Petara, nama mih nuan meri aku penguji bangat ngemesai tu? Aku agi belala begulai enggau apai seduai indai aku. Agi belala merap seduai iya. Diatu aku udah nyadi anak patu balu. Aku besampi ke nuan Petara ngambi nuan meri aku pengujur dalam pengidup aku ari diatu datai ke jemah ila. Beri aku pemandai dalam pengawa sekula. Beri pengerai mega ngagai ini aku ti dikesayau ke aku. Ngarap ke nuan ninga sebana ati aku,” ku munyi sampi Serina dalam ati iya ngenang penusah diri.

Chukup pengelama udah Serina diau begulai enggai ini iya ba rumah panjai. Aki iya megang udah lama ngejang ninggal ke dunya. Semina ini iya aja mih reta tengkira ke bisi dikembuan Serina ba dunya tu. Ini iya meh nyadi ke apai indai iya diatu.

Sepengudah matah ke lengan engkayu daun babas Serina enggau ini iya berandau ba dapur. Serina chukup siru meda pendiau ini iya. Ini iya mega selalu bepesan ngambi iya belajar bebendar ngambi juluk ati tau nyadi nyata.

“Endun, anang mulut aja madah ulih tang patung enda nyaut. Anang baka ragak riang enti dipansuh enda bulih seputung munti. Regas ngesai ke bulu gundai anang alah singkang laban orang.”

Jaku lalau ini iya semampai dikingat ke iya belama. Iya enggai dikumbai orang sempama masuk pending kanan pansut ari pending kiba. Serina sigi mujur ba pengawa sekula. Iya siku ari sida serumah panjai ti suah bendar niki ke panggau lebuh maya pengawa nyua ke setipikit. Ini iya sigi temegah ati belama meda Serina mujur dalam pengawa besekula.

Maya kemisi sekula Serina mantu ini iya bekebun. Asil ari betanam nya meh dikena ini iya meli perengka sekula Serina. Serina chukup rajin mantu ini iya laban iya kasih meda ini iya ringkuh-ringkuh megai changkul ba kebun. Enti maya lepa Serina sigi enda muai masa iya pia aja. Iya kisuk bebuka ke bup latih iya laban iya nemu peresa SPM taun dudi nyin ila.

Taja manah bakani pan ati budi mensia ba dunya tu bisi mega orang enggai meda pendiau siku-siku. Serina suah amat dipejai Indai Layong. Indai Layong nya kena ibu sida Serina empu. Ibu iya nya chukup jai mulut laban ke kelalu ngerigang ke anak iya Layong. Layong sama serambau enggau Serina semina Serina laun ada berapa ari aja dudi ari Layong.

Kutap-kutap belama mulut Indai Layong bejaku ke ruang bilik orang bukai. Iya enda ngasai sereta meda pendiau diri. Indai Layong udu amat muji anak iya pandai sekula sereta bagas gawa. Nyau ka tejeluak sida serumah panjai ninga iya muji anak bujang iya nya belama.

“Serina, nuan nya belajar bebendar nadai meh guna. Ukai ini nuan nya bisi anak sen kena nyengula ke nuan ngagai tikas ke lebih tinggi agi. Uji nuan belaki bisi agi penguntung. Pandai bakani pan nuan ujung-ujung ba dapur meh endur nuan diau ila. Uji peda nuan Dom Layong kami sigi pungka lelaki ke sagi ati sera nyawa kami duai apai iya. Chukup mereti sereta manah enggau apai indai. Sigi maju anak aku nya ila sekula laban aku bisi duit kena nyengula ke iya. Enda baka nuan nya sigi peturun orang mensekin. Peda nuan gamal ini nuan nya nganti ka mutus ke seput aja!” Licha Indai Layong ngasuh terutu ai mata Serina enggai badu laban sinu gaga menyadi niang indai iya empu bakanya.

Serina lalu mai ini iya tama ke bilik laban enggai ninga utai disebut Indai Layong. Suah amat Serina seduai ini iya udah digaga Indai Layong baka nya. Sigi jai ulah indai tuai nya laban pendiau iya nya meh dititihka anak iya empu. Munyi ko orang tuai labang apai labang mih anak.

“Nama penyalah aku ba nuan ibu? Sampai ati nuan madah aku baka nya. Enda ngawa aku merinsa diatu. Dudi hari ila nuan meda. Baru nuan nemu ni peninggi langit sereta pengerata tanah endur nuan berindik. Ingat nuan laban lansar tau nyadi lubuk sereta lubuk nemu nyadi lansar. Taja ini nadai duit kena melanja aku sekula aku ulih kereja ngiga belanja kena nyambung pelajar aku.” Serina muchau ngenang nasib iya ke digaga ibu diri empu bakanya.

“Endun, anang nuan nelan jaku ibu nuan nya tadi. Nya mih aku selalu madah ke nuan ngasuh nuan belajar bebendar. Anang ngereja pengawa baka timau jampat medah. Biar aku bekikir bulu betis bekesai bulu gundai nyengula ke nuan endun. Anang irau nuan belanja kena nuan sekula ba tikas ke tinggi laban bisi duit simpan tinggal ke niang apai nuan suba ba aku,” ku ini iya mujuk Serina ngambi badu nyabak ngenang ulah Indai Layong ke baka nibarka jala enda betating nya.

Leka manik burak nerutu labuh masah ke kuyu Serina lebuh maya iya merening mua ini iya. Lebuh maya meda mua ini iya Serina sigi tekenang ke niang apai enggau indai iya. Kadang-kadang iya nyalah ke Petara laban kelalu tumu ngambi orang ti dikesayauka iya. Apai seduai indai iya suba jadi mali laban maya seduai melah pinang disayat ke niang aki iya babi kena apai seduai indai iya mandi.

Jebi seduai aka iya Jalut suah amat ngesah ngagai bilik sida Serina laban rindu besulu enggau iya. Jebi sama serambau enggau Serina. Jalut udah badu sekula laban nadai pemandai munyi ko indai iya empu. Jalut udah belaki tang laki iya jauh kereja di menua tasik. Ulah Jalut agi baka ulah sida Jebi taja udah bisi dua iku anak mit.

“Ina, uji nuan ngajar aku ngaga karang kedut tu. Bangat enda nemu aku ngaga tu. Lebuh maya Pengajar Yunus ngajar aku enda mending ke jaku iya laban tembu berandau enggau Inya. Kati ngaga tu dih?” ku tanya Jebi.

Serina madahka chara bakani ngaga karang kedut munyi ke tanya Jebi. Chara Serina ngajar Jebi semampai dipuji Jebi laban Serina chukup landik amat ngaga karang enda ngira nya karang kedut tauka karang akademik. Serina ngajar Jebi chara mansik saut ke engkeman sereta bakani bejuraika leka jaku dalam saut tanya.

“Terima kasih pengajar.”

Hari beganti hari, bulan beganti bulan kemisi sida Serina udah datai ba adan. Sebedau pengawa sekula berengkah Serina nyendiaka perengka ke patut aja laban iya enggai masau belanja kena meli perengka ke enda tentu diguna. Iya enggai dikumbai ini iya antu rua. Serina masuk pom lima. Iya deka belajar bebendar ngambi ke bulih pemandai kena nimpai diri dudi hari ila.

“Oh Petara, aku besampi ngagai nuan ngambika aku mujur dalam pengawa sekula aku. Aku deka belajar bebendar agi laban aku ngambi peresa SPM baka ke taun tu. Berkat mega pengerai pengidup aku enggau ini aku.”

Baka ke lemai nya sebedau malam mansutka bulan sida serumah iya ngaga pengawa miring sereta bedara ke anembiak sekula. Malam nya mega sida iya ngintu taun baru. Sida serumah ngirup ai pengayu pukul dua belas malam lalu besampi ngambika panjai umur sereta bulih jereki ari taun ke udah.

“Sa, dua, tiga, empat, lima, nam, tu...juh! Oh ha! Oh ha! Oh ha! Nya alai enda aku busung ngelangkah gunung, enda aku tulah ngelangkah tanah, enda aku danjan engkadah bulan, miau seduai ke duduk berimbai. Nya alai aku miau ke selanjau ijau manuk banda, ngangauka Anda Mara seduai Raja Sempulang Gana, ngambika mai ubat ngasuh tampak rita jelai nama, ngambika seduai tak pengari tebilang temu semua bansa, udah nya dibiau aku enggau selanjau ijau manuk tuntung ngambika seduai enda mudah danjan dulu pumpung, bakani ku enda dih, enti siku antu deka munuh, bekerindi Petara ngambu seduai ke menyadi, enti siti pengaruh deka munuh sepuluh sakang nyadi pengembar tubuh.”

“Udah nya ada dibiau aku enggau selanjau manuk tawai, dikena ngangauka bala Petara iring Bujang Rangkang Kirai, ngambi ubat penampung seput umur panjai, ngasuh seduai panjai begulai datai ke tuai, nya alai enda alah aku tiap baka niap laja serangkap genap, enda alah aku itung baka ngitung baya benung beratung, tak datai abis, datai lengis, semua kita bala Petara mai ubat serangkap genap seribu guna, ada betuchung meh seduai baka bukit, bekebung meh seduai baka langit, laban ke jelai rita pegari nama, gayu guru ku Petara, gerai nyamai ku Sempandai, kaya raja ku Sempulang Gana.”

Baka nya mih bunyi biau Tuai Rumah Empeting lebuh iya ke nyadi tuai biau Igat Sandai jadi melaki bini enggau Endun Sawai. Tuai Rumah Empeting selalu nyadi tuai rumah chunto serata menua sida laban iya sempama bisi niki nibung bisi niki pinang. Iya enda bechiping lebuh ngatur pengawa ba genturung pendiau sida.

“Enda tetengut ati nuan meda Endun Sawai udah belaki Serina? Anang jugau nuan kada ke benung baru angkat dara. Mayuh manuk lanjau kitai serumah tau nyadi tangkup nuan. Sekula nadai mih guna. Masau duit ini nuan aja.”

Indai Layong enggai badu-badu bejaku nyindir Serina enggau ini iya. Orang bebala mayuh ke bisi datai bela bepering pangan diri meda Indai Layong bejaku baka nya ngagai Serina. Indai Layong indah baka pandak mulut engkerasak panjai mulut kitai.

“Indai Layong, lapa nuan bejaku ke Endun Serina aja dih? Lapa nuan enda ngasuh anak bujang nuan nya bebini? Bisi menantu nuan nulung nuan gawa ila. Kumbai nuan enda nemu kami anak nuan nya bisi ngembuan ati ngagai Endun Jebi tang Endun Jebi bangat enggai ke anak nuan laban anak nuan nya jai ulah ko Endun Jebi sebana. Anak nuan nya semina baka ikak lelangak ikan enda ngaban, kudi memuri hari enda ujan.”

Indai Mendun bendar bejaku nimbal Indai Layong. Indai Mendun sigi enggai ninga Indai Layong bejaie Serina seduai ini iya. Indai Layong enggai agi betimbal jaku enggau Indai Mendun laban enggai manjai ke laya. Enti suah amat charut seduai iya deka dibai ngagai mua tuai rumah.

Pulai ari sekula Serina lalu nembu ke kerja latih ti diberi pengajar ba sekula. Serina enda diau di buding laban sekula iya damping amat enggau rumah panjai sida. Tambah mega iya enggai ninggal ke ini iya kediri ba rumah. Udah semua pengawa sekula iya tembu Serina lalu mantu ini iya ba kebun. Baka nya meh pengawa Serina ninting hari. Taga jam belajar iya sigi diatur enggau manah laban jam udah serekat amat endur belajar. SPM semina tinggal sebulan aja agi.

“Ini, berat amat buah nangka tu. Enda alah tanggung aku,” ku Serina rising-rising ngayanka ngeli iya.

“Endun, anang baka pipit ke deka nelan buah embawang nuan. Nadai tulang nuan nya kering amat nanggung buah nangka nyau mesai tungkang nya. Legi apai sida Mendun ngesan buah nya,” ku ini iya ngemelika Serina.

“Serina, udah sedia nuan ka peresa SPM?” ku tanya Pengajar Jampong ke ngajar sida iya Pelajar Jaku Iban.

“Udah pengajar. Sigi udah nyadi pengawa meh belajar nya. Pedis untak aku ngingat ke semua formula ke patut. Ka pan enda udah selatan. Besampi ke kami nuan pengajar,” ku saut Serina mantai ke sada ati iya ngagai Pengajar Jampong.

“Sigi besampi belama aku ngambi kita mujur dalam perasa SPM enda lama agi. Anang bendar amat belajar sampai enda makai, enda ngirup, enda mandi semua Serina. Enda bepengerai kitai nama kelalu bendar,” ku Pengajar Jampong ngemelika Serina.

“Terima kasih pengajar ke sampi nuan.”

Layong bejalai ngelawa endur Serina duduk. Mulut Layong enti bejaku sigi nadai bida enggau mulut indai iya. Layong semampai ngemediska ati Serina dalam kelas sida iya taja iya nemu Serina selalu bulih lumur satu dalam kelas maya peresa. Layong nya lawa kerubung enda perisi. Jebi nyau redu-redu gamal iya meda ulah Layong ke meri jaku ngagai bakih iya Serina. Jebi sigi enda rindu meda Layong tambah mega sida sekelas udu amat nundi iya enggau Layong. Nya meh ngasuh ati iya nyau engkecam chuka.

“Nama randau seduai nuan Pengajar Jampong tadi Serina? Bisi endar utai ke ditanya nuan nya. Kada enda ka nguntik pengajar nuan nya Serina?” ku tanya Layong ngemediska ati Serina.

Serina enda nyaut utai tanya Layong laban iya enggai belaya enggau orang. Serina enggai malik mua Layong seraya Layong ke enda ngetu-ngetu nanya iya. Jebi nyau ka angkat ngerigang diri ngelaban Layong laban iya nemu Layong sigi takut ke iya.

“Seduai baka mayau enggau ukui. Enda tau begulai manah enggau pangan diri. Ila jadi seduai nama suah amat belaya maya agi biak diatu. Nuan Layong, kia-kia ngachau orang. Uji duduk jenuh! Bacha bup nuan. Ngambi nuan nemu nyaut peresa ila. Nya enda! Baka ukui ke deka beranak. Legi nuan nya ga ke dipuji indai nuan ngelambung langit negkilah remang. Laban iya enda nemu keni ulah nuan ba sekula. Lalai ke nuan rian temu meh bau, tumbak ke nuan landak chechungak meh bulu, tungkus nuan abus tekebu meh abu. Uji ambi ke lalau, peda nuan bala sida Sanggin, Elok enggau Kelin ke bulih pemutus peresa paling manah taun nyin suba. Udah belajar ba menua tasik din magang bala sida iya. Nuan tu lain, sigi rindu nanchang tali perau.”

Enda tepansut ke leka jaku agi Layong seduai Jebi lebuh ninga Serina meri jaku lalu ngagai sida iya sekelas. Serina bejaku baka YB bejaku serimbai enggau atur pengawa besai. Layong nyau pata pitak ke dibuai mata. Enda engketut agi burit iya ninga Serina nimbak iya ngena seterum penabur. Alu temati kutu enda tepansut ke jaku.

Baru nyingkang ba kaki tangga rumah Serina ninga orang kutap-kutap bejaku. Munyi orang benung muchau. Jebi pan bisi ninga. Seduai sama beperening pangan diri laban enda nemu nama utai udah nyadi ba ruai rumah sida iya. Seduai lalu nyingkangka kaki diri masuk ke dalam rumah.

“Serina! Nama nuan udah gila pia? Nama nuan nganu anak aku ba sekula tadi? Uji cheremin dulu mua nuan nya sebedau nuan bejaie anak asi aku tu! Nama kita nadai cheremin di bilik pia Ini Serina?  Gamal baka nuan nya tau nibuh nganu anak aku. Aku nemu ngajar anak aku.”

Indai Layong muchau enda nemu badu laban Layong udah ngeripot ngagai iya Serina meri iya jaku ba sekula tadi. Layong nya nemu melitka cherita. Iya nusi ngagai indai iya utai bukai laban iya rindu meda indai iya nganu Serina. Layong sigi digelar orang serumah panjai sida iya ‘anak ibu pemelit’ laban murih ke indai iya empu.

“Ibu, nuan bejaku munyi orang ngirau rendai dalam kali. Nyarih amat retih munyi nuan bejaku. Enti nuan enda nemu cherita anang guai bejaie orang. Anak nuan nya nemu bula. Nemu melitka cherita. Murih amat ke nuan empu. Iya nya ke dulu ngachau Serina dalam kelas tadi. Iya nuduh Serina nguntik Pengajar Jampong. Sapa ka tuduh orang baka nya? Enti aku chukup enggai digaga orang bakanya. Uji ajar nuan anang nuan nya ibu. Anang kelalu diasi laban iya selalu mega dianu bala pengajar ba sekula. Asuh belajar bebendar iya ngicha ke landik dichunggai ujung jari. Anang ngasuh iya belama nanchang tali perau ke kami sekelas.”

Chukup panjai jaku Jebi nganu Indai Layong depan sida serumah panjai. Taja Jebi agi sekula pom tang iya chukup berani ngelaban orang tuai laban iya nemu bakih iya Serina enda salah. Indai Layong agi ngeringka diri ninga Jebi bejaku. Layong sigi enda berani ngayanka mua iya laban iya takut meda Jebi. Benung Indai Layong ka nimbal Jebi bejaku lalu tuai rumah ke benung chechegit meda ulah sida iya lalu tuai rumah nagang iya bejaku. Iya lalu enda mansutka leka jaku.

“Indai Layong, nuan anang meda ari siku tubuh mensia aja. Anang ngumbai anak nuan nya manah baka Petara. Mayuh orang besebutka ulah Layong nya ba sekula din. Nuan nya ke udu muji anak nuan nya. Enti nuan ka nemu anak nuan nya nyadi antu ba sekula. Ba rumah ditu iya ngaga diri mereti enggai ke nuan nemu bakani ulah iya ke bendar. Bejaku anang peneka ati aja. Enti nyema nuan ngeludah ke langit mingkai ila utai ke diludah nuan nya labuh ninggang mua nuan empu.”

Tuai rumah meri jaku ajar ngagai Indai Layong laban iya sigi nemu bakani ulah Layong nya. Indai Layong lalu ngirit jari Layong tama ke bilik. Nibuh ke deka nganu Layong seleka jaku iya enda mansut laban kelalu sayau ke anak iya ke semina siku nya aja idup ke pengudah empat iku anak iya mati maya umur setaun dua.

Peresa SPM udah berengkah. Serina enggau Jebi semampai tuchum-tuchum belama pulai ke rumah udah nyaut peresa pelajar ke ambi seduai iya. Mayuh jaku peransang diberi bala pengajar, bala bakih enggau bala sida serumah ngagai sida ngambi mujur dalam peresa. Nadai penanggul nekur laban seduai sigi bendar amat belajar. Enda berasai udah datai ngagai peresa ke pengabis dudi. Sida manjung gaga laban udah ambis belajar ba pom lima.

“Ina, nama pengawa tua kemisi panjai tu ila? Lelak amat ga nadai pengawa. Nuan ka enggau aku kerja di pasar din? Kerja KFC ka nuan? Enti enda kerja sebelah kedai tau meh.”

Jebi merambu pengawa seduai iya maya lepa laban ke nganti pemutus peresa pansut bulan tiga taun siti nyin ila. Serina enggai ninggal ke ini iya kediri nya kebuah iya enggai bai Jebi gawa di menua pasar. Iya rindu agi nulung ini iya bekebun nanam sayur. Jebi sigi rindu gawa ba menua pasar laban iya selalu gawa lebuh maya kemisi.

“Kati gaya peresa kita endu? Kati asai iya? Bisi jalai kini? Enti mujur ila jauh amat pejalai seduai nyambung pelajar ngagi tikas ke tinggi agi,” ku Indai Mendun nanya Serina enggau Jebi ke benung duduk berandau ba ruai sida Serina.

Chun ga maya nya Indai Layong pansut ke ruai mai timpa iya ke bedau tembu dianyam. Iya selalu nganyam timpa ba ruai ngulih ke puput ribut. Enti iya pansut anak iya Layong pan lalu nitih. Baka belakangkas seduai mindai nya munyi ko orang nusi. Indai Mendun lalu ngemesai ke munyi nyawa iya bejaku laban deka ngasuh Indai Layong pedis ati.

“Baka nya meh ibu. Enda ga pedis amat saut tanya peresa nya. Enti bisi nasit bulih mih ila. Besampi aja mih ngagai Petara ngicha ke iya meri berekat,” ku saut Jebi ke sigi lanchat agi bejaku.

“Manah mih enti pia endu. Kati baka nuan dih Layong? Bisi jalai kini nuan? Selalu amat ninga orang sekesa muji nuan pandai sekula. Mereti badas mentas sereta manah perangai.”

Indai Mendun sengaja nanya Layong laban rindu ninga indai iya kuchau-kuchau laban ke enggai ninga orang bejaie anak iya. Indai Layong enda peduli ke jaku Indai Mendun laban udah dienchak ke tuai rumah sarinya.

“Enti asai enda ulih nadai ko enggau meh anak. Anang guai manjung di  pala wung. Meda baka ila mih,” ku Indai Mendun madah ke Layong ke benung kisuk nekan ke telipun binching ke baru dibeli indai iya kemari.

Sepemanjai kemisi Serina nulung ini iya ngumpul sayur sereta bejual di tamu. Mayuh asil ulih seduai iya laban Serina ngereja pengawa enda munyi ko sempama remaung di rumah raung di tanah laban iya bagas di rumah di tanah pan iya bagas. Duit ke ulih seduai ini iya nya disimpan dalam bank laban dikena Serina nyambung pelajar iya enda lama agi.

“Endun, demalam aku mimpi meda nuan diberi Indai Mendun sepuluh iku anak manuk. Mentas amat nuan ngibun anak manuk nya. Nyau baka ngibun anak mit nuan nyaga anak manuk nya,” ku ini iya ngerandau Serina lebuh seduai makai lemai.

“Nama mih reti mimpi nya ini? Demalam aku mega mimpi diberi niang apai aku duit RM1000. Gaga mih ati aku nerima duit nya laban munyi ko jaku duit nya dikena aku nyambung pelajar aku,” ku Serina madah ke mimpi iya mega.

Ini iya madah ke reti mimpi Serina nya. Serina besampi ngagai Petara ngambika Petara meri iya pemutus peresa ti manah laban iya deka juluk ati iya nyadi nyata. Jebi mega bisi bemimpi ke Serina madah Serina diberi Pengajar Jampong sepuluh iti batang pinsil kena iya nulis.

Serina enggau Jebi seretai ngambis pemutus peresa ngagai sekula. Serina enggau Jebi gaga ati bendar laban seduai iya nyadi anembiak paling nyulut dalam SPM taun nya. Seduai bulih 10 A semua subjek ke diambi seduai dalam SPM. Seduai iya beberap laban kelalu gaga.

Bala pengajar, anembiak enggau bala ke serambau enggau seduai meri jaku pengaga ati ngagai seduai iya laban bulih pemutus peresa paling manah. Serina tembu merati ke Layong ke chechegit meda pemutus peresa iya. Mua Layong bebali nyadi mirah engka kelalu sinu meda pemutus ti ulih iya.

Berita Serina seduai Jebi ke bulih pemutus peresa ti manah udah ngerekai ba rumah panjai sida iya. Indai Mendun enda ngetu-ngetu muji seduai iya ba ruai laban Indai Layong mega bisi ba ruai maya nya. Indai Layong enda bemunyi laban iya bedau nemu nama utai ulih anak iya.

“Manah amat utai ulih seduai mang. Nyadi lutur mih seduai nuan ila,” ku Indai Mendun merap Serina seduai Jebi.

Serina nyabak merap ini iya laban kelalu gaga. Ini iya enda tepansut ke jaku agi laban kelalu gaga meda utai ulih uchu iya. Indai Jebi mega enda nyangka Jebi bulih pemutus peresa sebaka enggau Serina laban Jebi selalu belajar begulai enggau Serina.

“Layong, nama utai ulih nuan?” ku Indai Mendun nanya Layong ke baru datai ari sekula.

Layong nyua ke slip peresa iya ngagai Indai Mendun. Indai Mendun manjung meda utai ulih Layong. Semina pelajar bahasa Melayu aja iya bulih C tang ia ke bukai bulih E magang. Indai Mendun enggai bebunyi agi laban enggai ke Indai Layong pedis ati.

“Mayuh amat sugu ulih nuan Layong. Nama mih penyadi nuan tu anak,” ku indai iya murus pala.

Sebulan udah peresa SPM pansut, Serina enggau Jebi bulih kangau nyambung belajar ba menua tasik. Seduai bulih dalam bidang lutur. Seduai nyambung pelajar ngagai menua Rusia. Berat asai ati Serina ka ninggalka ini iya di menua kediri. Jebi mega semadi laban iya chukup enda betah jauh ari apai indai iya.

“Seduai nyaga diri enggau manah ba menua orang. Anang bacho-bacho.”

“Belajar bebendar seduai endun. Anang mantul ngapa.”

“Jaga manah ini aku ibu. Ila enti udah ambis belajar aku pulai ke menua ngabas kita.”

“Selamat tinggal indai, apai.”

Baka nya mih munyi randau sida sebuat sebedau Serina enggau Jebi nepan bilun ngagai menua Rusia. Serina temegah ati laban iya udah mujur bulih pemutus peresa ti manah. Iya kala dianu Indai Layong macham-macham tang jaku nya mih nyadi peransang iya dalam pengawa sekula. Iya siku indu ti tan ati laban iya nemu pemandai aja ulih ngubah pengidup merinsa tau nyadi senang. Munyi ko ini iya madah lansar tau nyadi lubuk, lubuk tau nyadi lansar. Serina enda mudah putus pengarap laban iya nemu pengering ati mih nyadi kaban dalam ngelaban semua penguji.

Sepengudah betaun Serina belajar iya udah bulih pangkat lutur. Iya nyadi lutur anak mit. Diatu Serina bisi ngembuan klinik anak mit kediri empu asil ari pemandai enggau pengerajin iya sekula. Ini iya gaga bendar ngembuan uchu ti chukup badas baka Serina. Serina mega udah bisi ruang bilik kediri empu. Iya jadi melaki bini enggai lelaki ke sama belajar enggau iya ba menua Rusia suba. Nama laki iya Garry Leong. Laki iya bebansa Cina.

Pengidup Serina chukup menyana baka ke diatu. Iya kereja ba klinik iya empu. Serina Child Care Centre. Siku indu ti patut nyadi chunto ngagai bala anembiak jemah diatu. Siku indu ti mentas enggau semua orang. Rajin dalam pengawa sekula. Mentas enggau orang tuai. Manah budi basa. Indu tu mih benama SERINA.